3-тапсырма. Тірек сөздердің көмегімен Астанадағы Қала күні мерекесінің тойлануы туралы сөйлем құрастырып жаз. Ұлт аспаптар оркестрі, ұлттық өнер, мерекелік концерт, мерекелік отшашу

Астана күні қалай тойланады?

Астана – тәуелсіз еліміздің бас қаласы, отанымыздың жүрегі, мәдениеттің ошағы, ғылым мен білімнің ордасы. Арқаның төрінде сылдырап аққан Есілдің жағалауында орналасқан айбынды Астанамыз жас та болса, болашағынан зор үміт күттіретін қала.

Елорданы Алматыдан Ақмолаға ауыстыру туралы шешімді Қазақстан Республикасы Жоғарғы Кеңесі 1994 жылы 6 шілдеде қабылдады. Астананы ресми көшіру 1997 жылғы 10 желтоқсанда жүзеге асты. Президенттің 1998 жылғы 6 мамырдағы Жарлығымен Ақмоланың атауы Астана болып өзгертілді. Жаңа астананың халықаралық тұсаукесері 1998 жылғы 10 маусымда өтті.

Астана күні елімізде мемлекеттік мереке саналады, әр жылдың 6 шілдесінде қала күні аталып өтіледі. Жыл сайын бұл күні бүкіл Қазақстан бойынша ауқымды іс – шаралар өткізіледі: ұлт аспаптар оркестрінің концерттері, көрмелер, халықтық серуендер, спорттық сайыстар, ұлттық ойындар, ұлттық өнер фестивальдері ұйымдастырылады. Елордаға алыс – жақын шетелдер мен еліміздің барлық аймақтарынан қонақтар мен әртістер келіп, мерекелік концертке қатысады. Қала күні қарсаңында басталған мерекелік іс – шаралар айдың соңына дейін жалғасын табады. Бұл күні жас жұбайлар отау тігуді де дәстүрге айналдырған. Мерекенің соңы мерекелік отшашумен аяқталады.