2. Ұлттық құндылықтар туралы не білесің?

Шұрқырай кісінеп, жер тарпыған жануар дыбысынан оның тұлпар екенін көзбен көрмей-ақ сезуге болады. Себебі, он сегіз мың ғаламмен байланысып жатқан табиғат-ананың кең құшағындағы әрбір тіршілік иесінің өзіне ғана тән үні мен ерекшелігі, сұлулығы мен сыры бар. Әр ұлттың да. Сөйлеген сөзінен, тілінен, ұлттық киімінен, дәстүр-салтына сіңген іс-әрекетінен оның қай ұлт екенін айғақтау қиын емес. Өйткені, әр ұлттың өзіндік құндылықтары сол халық өміршеңдігінің мәңгілік энергиясы, қайнар бұлағы. Ол ұлтты ұлт қылып қалыптастырып кеткен бекзада бабалар мен ақ жаулығы арындай әппақ ардақты аналардың ең қастерлі аманаты.