Туған жер табиғаты 1923 жылдың 18 қазан күні С.Сейфуллин мен губерниялық атқару комитетінің председателі Киселев мінген автомобиль Жымпитыға келеді.
«Біз Орал қаласынан күндіз сағат 12 шамасында шықтық. Мінгеніміз – автомобиль. Жымпиты Орал қаласының күншығыс-оңтүстік жағында. Күн еңкейген мезгілде Жымпиты қаласына келдік. Қаланың жанындағы бір жымпиған, жылмиған өзеншіктен салған кішкене тақтай көпірден өттік.
Қалаға кірдік, қала қазақ қаласы, қалада орыс тіпті аз ғана; бірақ қаланың өзі қала емес, орыстың поселкесінен кішкене, шикі балшықтан салған қазақтың үйлері әм үйшіктері. Көше жоқ десе де болады. Қаланың ортасында төбесін шатырлаған 3-4 үй бар. Сол үйлерде – мекемелер.
Қала әлгі өзеннің жағасындағы бір сортаң (сазды) жерге салынған екен. Азғантай дымқыл жаңбыр болса, аяғың жерге жабысып қалады. Галошыңды алып жүру қиын. Қаланың ішінде балшықтары төбе болып езіліп, үйіліп жатқан бұзылған үйлердің орындары көп.

дира3    3   14.04.2021 10:39    3